“You have to fight to reach your dream. You have to sacrifice and work hard for it.”「為了實現夢想，你必須奮鬥；你必須做出犧牲，必須為之努力。」 七屆金球獎、六次世界足球先生以及六座歐洲金靴奬，美斯憑住約一米七嘅身型同招牌黃金左腳，喺球場上扭過一個又一個對手，射入一個又一個入球，舉起一個又一個奬盃，亳無疑問係廿一世紀其中一位最成功嘅足球員。 但你又知唔知，在10號球衣嘅光輝下，美斯喺10歲時都差少少就要放棄足球？ 那年十歲嘅美斯，身高只有4尺2吋。喺草場上，美斯係最快嘅一個同時亦係最矮小嘅一個。後來經診斷後，證實美斯患上俗稱「侏儒症」嘅「生長激素缺乏症」，Growth Hormone Deficiency (GHD)。如果唔接受每個月約1,500美金（約現在＄11700港幣）嘅治療，美斯就永遠只有4尺2吋嘅身型，而成為一名職業足球員亦要就始告終。身在普通阿根廷家庭嘅美斯，根本無可能負擔如此昂貴嘅醫藥費。面對夢想同現實嘅落差，10歲嘅小美斯唯一可以做嘅就係喺綠茵場上證明自己，不斷表現自己嘅才華。幸好上天垂憐，在美斯喺13歲時已經喺阿根廷當地青年隊攻入超過500球嘅同時，他「新馬勒當拿」嘅稱號亦開始傳到歐洲。在美斯家人同球探嘅幫助下，美斯得到去巴塞隆拿青年軍十五日嘅試腳機會，如果成功被巴塞選中，美斯嘅治療費用就可以獲得全額資助，但條件係美斯需要喺十五日內不斷交出成績向球隊證明投放係值得。 試想像一個13歲嘅細路要飄洋過海到一萬公里外嘅陌生國度，為嘅只係一個可以延續夢想嘅機會。當一個失誤就可能要同最心愛嘅足球永別，小美斯當時要面對嘅壓力何其龐大。巴塞隆拿訓練營滙集來自世界各地嘅天才球員，生性內向嘅美斯面對各種外界嘅衝擊和冷嘲熱諷，只好硬著頭皮去抵抗，默默咁喺草場上表現佢嘅夢想——足球。當所有人以為美斯只係一個不起眼嘅內向細路，美斯用佢嘅才能同努力征服整個巴塞訓練營。最終，美斯被選入拉馬西亞青訓練營，拉開自己傳奇生涯嘅序幕。 至今，美斯嘅名氣家傳戶曉，但成名嘅背後，美斯俾人嘅形象往往係努力、謙卑、低調。喺足球場上，天才比比皆是，而美斯之所以能夠成為萬中無一嘅球皇，相信就係因為佢有個一段曾經需要放棄夢想嘅經驗，令佢對於每場比賽都十分認真、執著。美斯好清楚自己之所以可以喺球場上完夢，好大程度係因為身邊家人、朋友、隊友嘅支持和犧牲，所以自己需要更加努力奮鬥。直至今日，美斯每場比賽後都會洗刷自己嘅球鞋，避免喺泥濘跌倒。美斯每一次入球後，都會雙手指向天空，將入球獻俾佢嘅奶奶，那位第一個支持美斯踢波嘅人、那位最心愛美斯嘅球迷。 2022年卡塔爾世界盃，係美斯第五次同時可能係最後一次嘅世界盃，面對外界對於自己在國家隊表現嘅質疑，美斯仍然努力用自己嘅所有去奉獻足球，到底美斯能不能夠奪得世界盃冠軍， 為自己嘅職業生涯劃上完美句號？就讓我們一同去見證。